 |
انا مش عارفه اتصرف ازاي ولا ابدأ منين...
كنت بايته عند اهلي وقومت ادخل الحمام عالفجر كده لقيت اختي واقفه فالبلكونه بتتكلم فالتليفون ....
فضولي خلاني اقرب عشان اسمع بتكلم مين فالوقت المتأخر ده ويارتني ماسمعت......
انا بسنت عندي ٢٩ سنه متجوزه من خمس سنين اختي اصغر مني ب ٩ سنين وبتدرس فالجامعه ......
اليوم ده كنت بايته عندهم عشان جوزي كان وراه شغل ومسافر محافظه وهيعد يومين هناك.....
قومت ادخل الحمام لقيت هاجر اختي مش نايمه علي سريرها وسمعتها بتتكلم فالبلكونه بصوت واطي جدا
قربت بشويش لقيتها بتكلم حد وتقوله......
_ انا لازم انتقم منها وهقتلها ب ايديا دول هي متعرفنيش ومتعرفش ان انا الي حطيت السم في العصير ل .........
فجأه بنتي صحيت تعيط لما ملاقتنيش جنبها جريت احسن اختي تحس اني كنت بسمعها وهتسمع صوت عياط البنت ولقيتها جايه ورايا ومخضوضه😳
_ انتي كنتي فين....
_ كنت فالحمام و سارة لما ملاقتنيش جنبها صحيت تعيط....
انتي ايه الي مصحيكي دلوقتي.....
_ مفيش مجاليش نوم قولت اصحي اعد فالبلكونه شويه بس هدخل انام دلوقتي عشان ورايا جامعه كمان كام ساعه .....
استنيتها دخلت تنام وانا مرعوبة من الي سمعته ...
معقولة هاجر اختي الملاك تقدر تأذي نملة حتي بس دانا سمعت ب وداني الكلام ...
ومجاليش نوم خالص اليوم ده 😱
استنيت لما نامت ومسكت تليفونها اشوفها كانت بتكلم مين .....
اتصدمت اكتر لما لقيت الرقم الي كانت بتكلمه اتمسح ....
وقولت ادخل عالواتس يمكن اوصل ل حاجه .......
لقيت عالواتس رسايل من اصحابها كتير بس الي لفت نظري رقم غريب في بينهم رسايل كتير.....
دخلت اقلب فيها كلها كلام مش مفهوم ولا حتي يدل هل دا راجل ولا بنت.....
_ انا هاجي وهجيب كل الطلبات معايا بس المطلوب كله هيتنفذ .....
_ علي اتفاقنا بس الطلبات تكون كاملة......
وانا بقلب فالرسايل اختي صحيت فجأه وطلعت من الواتس بسرعه بس شافتني ماسكه التليفون.....
_ انتي ماسكه تليفوني ليه....
_ مفيش كنت عاوزة ارن علي نفسي.....
_ تليفونك جوة فالاوضه .....
وراحت واخده تليفونها بسرعه.......
فضلت افكر واقول طب انا هعمل ايه دلوقتي ....
اروح احكي ل ماما ولا بلاش اما اتأكد الاول ان في حاجه بجد ....
قررت اني هسكت وهراقبها من بعيد اليومين الي قعداهم.....
تاني يوم الصبح نزلت راحت الجامعه بتاعتها وانا فضلت قاعدة مستنياها ترجع.....
اول مارجعت دخلت بسرعه الحمام دخلت انا الاوضه افتش في حاجتها وشنطتها .....
فتحت الشنطة لقيت فيها حاجه خليتني اتصدم صدمة عمري......
ممدوح سليم
الجزء الثاني ورونا تفاعلكم بكومنتات ومشاركات
فتحت شنطة اختي فضلت افتش فيها فجأه لقيت صورة فيها واحدة وواحد كبار ومعاهم ابنهم شاب بس الي صدمني لقيت صورة الراجل معمول عليها علامة إكس ياترا مصير الراجل ده كان ايه وهل اختي ليها علاقه بالموضوع !!!!!!!!
فجأة لقيتها خرجت من الحمام وشكلها مرهق جدا....
_ مالك ياهاجر...
_ مفيش تعبانه شوية من الجامعة ومنمتش كويس....
_ طيب ياحبيبتي انا اختك لو فيه اي حاجه مديقاكي ممكن تحكيهالي ....
_ مين قالك ان في حاجه مديقاني انا كويسه .....
سيبتها وخرجت برة وانا مش متطمنه خالص ياترا ياهاجر في ايه وراكي ومين الناس دول وايه علاقتك بيهم.....
كلمت جوزي وطلبت منه اعد اسبوعين عند ماما عشان تعبانه وهو مرفضش....
هو طبعا ميعرفش اني قاعدة عشان اراقب هاجر واشوف البلاوي الي وراها .....
وجايز كمان اكون ظلماها بس انا متأكده ان فيه حاجه مش طبيعية فالموضوع ده......
فضلت صاحية طول الليل عشان اسمعها لو اتكلمت فالتليفون ....
وفعلا لقيتها بتكلم حد وتقوله....
_ انا روحت النهاردة بس معرفتش اخلص الموضوع عشان كنت تعبانه ....
ومحتجاك تكون معايا انت دبستني لوحدي في كل حاجه وباعد نفسك خالص......
.......
_ طيب هستناك بكرة او بعدة لما تفضي ابقي كلمني....
جريت عالاوضه بسرعه عشان لما تطلع متشوفنيش.....
واعدت افكر ياترا هي بتكلم مين وبتقوله كده ليه....
هاجر حتي مش مرتبطه ولا ليها اصحاب وراحت فين النهاردة ....
انا لازم بكرة امشي وراها واروحلها الجامعه اشوف الي بيحصل هناك ولو شافتني كأني عامللها مفجأه وجايه اخرج معاها بعد الجامعه....
نزلت هي الصبح بدري وانا قومت وراها ولبست بسرعه وسيبت بنتي نايمه وماما معاها......
وطلعت عالجامعه ودخلت جوة وبدأت اسأل عليها ومحدش بيرد عليا ولا عارفها خالص....
حتي الدكاترة مخلتش حد مسألتوش كأن الارض انشقت وبلعتها....
بس انا مش هخرج من باب الجامعه غير لما اعرف هي فين وايه الي بيحصل....
طلبت اقابل عميد الجامعه رفضوا يدخلوني....
لكن انا اصريت وبدأت اعيط وانهار وبالفعل طلب يقابلني ......
_ خير عاملة إزعاج ليه....
_ انا بدور علي اختي هي طالبة عندكم هنا وانا مش لقياها ومحدش عارفها في دفعتها....
_ اسمها ايه اختك دي ....
_ اسمها هاجر محمود البدراوي....
_ استني وهرد عليكي ....
لقيته فتح الكمبيوتر بيبحث عنها وبرضوا مش لاقيها...
استني استني انتي قولتي ان اسمها هاجر محمود البدراوي....
_ اه اسمها كده في ايه حضرتك تعرفها....
لقيته وشه اتغير خالص .....
_ هو انتي متعرفيش ان اختك......
ممدوح سليم
الجزء الثالث
_ هو انتي متعرفيش ان اختك انفصلت من الجامعه من سنتين....
= ازاي الكلام ده دي مفهمانا انها بتروح كل يوم وانفصلت ليه وايه الي حصل....
_ ازاي متعرفيش الي حصل وانتي اختها ....
اختك حاولت تقتل واحدة زميلتها وكانت هتتحبس لكن اكتفينا بالفصل بعد ما لحقنا البنت وهي الي قالت انها سامحتها وكان واضح ان اختك مضطربة نفسيا او كانت بتمر بأزمه نفسية....
انا بصراحة صعقت لما سمعت الكلام ده وسيبته ومشيت....
ازاي محدش فالبيت حس ب كل الي حصل مع هاجر وماما فكراها بتدرس فلجامعه ....
طيب كل يوم بتنزل الصبح وترجع اخر النهار بتروح فين وبتعمل ايه .....
انا لازم انزل وراها بكرة واشوفها بتروح فين ومع مين.....
روحت البيت لقيت ماما قاعدة بتلاعب بنتي....
_ كنتي فين يا بسنت ...
= ابدا يا ماما نزلت اقابل واحدة صاحبتي بقالي كتير مشوفتهاش.....
هي هاجر لسه مجتش....
_ لا يا حبيبتي دي بتخلص جامعه اخر النهار كل يوم....
= ماما انتي مش ملاحظه حاجه غريبة في هاجر الفترة الي فاتت....
_ حاجه ايه يا بسنت انا بس الي ملحظاه انها مبقتش تنام وتاكل كويس خالص وعلي طول ساكته كده واتكلمت معاها كتير وبتقول انه من ضغط الجامعه....
هو في حاجه حصلت مع هاجر ولا ايه...
_ لا يا ماما اصل ملاحظة نفس الكلام الي قولتيه ده قولت اسألك....
فجأه الباب اتفتح بتاع الشقه وهاجر دخلت وكانت ساكته زي امبارح بظبط ودخلت علي اوضتها من غير متقول ولا كلمة دخلت وراها....
_ مالك ياهاجر انتي مش طبيعية خالص ليه ....
= مفيش حاجه انا بس تعبانه من ضغط الجامعه ...
كنت علي لساني لسه هقولها اني عرفت انها انفصلت من الجامعه بس مسكت نفسي عشان بكرة هنزل وراها واعرف هي بتروح فين بظبط .....
وبرضوا هشوفها بليل هتتكلم تقول ايه.....
جه الليل وعملت نفسي نايمه وهي لقيتها بتقرب مني تتأكد اني نمت وبتاخد تليفونها وتروح البلكونه ....
قومت وراها بسرعه عشان اسمع ويارتني ما سمعت....
_ يعني خلاص هتيجي بكرة وهنخلص الموضوع....
بس انت الي هتخلص ب ايدك انا مش مستفاده حاجه انت الي مستفاد انا بس يمكن ناري تنطفي.......
هستناك بس تيجي بدري......
قفلت التليفون وانا دخلت الاوضه بسرعه واستنيتها تنام ودخلت الحمام بسرعه لبست هدومي عشان ابقي جاهزة انزل وراها علي طول.....
والصبح بدري لقيتها صحيت وبتلبس ونزلت ....
جريت نزلت وراها بسرعه وراحت ركبت اتوبيس وانا وقفت تاكسي خليته يمشي ورا الاتوبيس....
لحد ما نزلت في مكان كله عمارات ودخلت عمارة منهم....
وحتي البواب مسألهاش رايحه فين وشكله كده يعرفها كويس.....
قولت اروح اديله فلوس واسأله هو اكيد هيفيدني بحاجه....
_ سلام عليكم....
_ عليكم السلام اؤمري....
_ انا كنت عاوزه بس اسأل علي البنت الي لسه طالعه دي هي مين.....
_ ليه وحضرتك عاوزه تعرفي ليه.....
_ بص هديك الي انت عاوزه بس تقولي هي مين وبتعمل ايه هنا.....
_ الست ياسمين دي تبقي.......
_ ياسمين مين..
_ الي لسه طالعه دي اسمها ياسمين وتبقي.......
ممدوح سليم
الجزء الرابع والاخير
_ الي لسه طالعه دي اسمها ياسمين وتبقي مرات استاذ خالد وبتيجي هنا تخلي بالها من مرات عمه عشان قاعدة علي كرسي متحرك من ساعه وفاة ابنها وجوزها لسه متوفي من شهر.......
_ ايه الي انت بتقوله ده وجبت الكلام دا منين .....
_ دا الكلام الي كل العمارة عرفاه وهو حتي ساعات بيجي وهي هنا وياخدها معاه وهو نازل وقايلنا انها مراته .......
_ طيب هو جي النهاردة .....
_معرفش ياهانم .....
_ طب هما ساكنين فالدور الكام......
_فالخامس الشقه الي علي ايدك اليمين .....
_ طيب شكرا اوي انا طالعه ....
طلعت فوق وانا مصدومه من الي سمعته هي حقيقي هاجر اتجوزت من ورانا طيب وايه يخليها تعمل حاجه زي كده مهي لو كانت بتحبه كانت تخليه يقابل بابا وماما وعمرهم ما هيرفضوه ....
اكيد في حاجه غلط فالموضوع...
طلعت فوق ورنيت الجرس وانا رجلي مش شيلاني....
لقيت هاجر فتحتلي...
_ انت فين كل ده بكلمك مش بترد
لقيتني في وشها من الخضه قفلت الباب تاني...
فضلت اخبط كتير ....
_ افتحي ياهاجر انا عرفت كل حاجه......
فتحت الباب ....
_ عرفتي ايه بظبط....
_ عرفت انك متجوزه من ورانا.....
دخلت جوه لقيت الست الي كانت فالصورة الي في شنطة هاجر قاعدة علي كرسي متحرك وبتبصلي ومش بتنطق....
مين دي يا هاجر ردي عليا مين دي مش دي ال كانت فالصورة الي في شنطتك ......
والله لو ماتكلمتي دلوقتي حالا هتصل ب بابا وماما اخليهم يجو هنا يتصرفوا معاكي....
فجأه لقيتها انهارت من العياط.....
_احكيلي يا هاجر انا اختك وهقدر اساعدك ....
_تساعديني ايه بس كل حاجه راحت.....
_ طب احكيلي ....
_ استني بس هحكيلك كل حاجه بس اقفل الباب كويس قبل ما يجي....
_ هو مين جوزك!!!!!!
_ جوزي مين انا مش متجوزه.....
الموضوع بدأ من حوالي سنتين ونص اتعرفت علي واحد فالجامعه وحبينا بعض ومامته لما عرفت سافرته بره عشان يكمل تعليمه ويتجوز عشان كانت عوزاه يبعد عني رحت اتكلمت مع باباه عشان يحاول يخليها توافق لكن رفض هو كمان.....
وهو مسافر الطيارة بتاعته حصل فيها عطل ووقعت ومات قبل مايوصل ......
الست دي هي الي دمرتني ودمرته عشان كده انا هنتقم منها زي مانتقمت من جوزها.....
_ عملتي ايه فجوزها....
_ حطيتله سم فالاكل......
_ ومين بقي الي بتكلميه دا الي الناس فكراكي متجوزاه.....
_ دا يبقي ابن عم الي بحبه وبيساعدني في كل حاجه عشان هو من مصلحته انهم يموتوا ويورث كل ده بعد ما ابنهم مات.....
_ انا بجد مصدومه فيكي انتي ازاي قدرتي تعملي كده انتي مش ممكن تكوني اختي الي اتربينا مع بعض.....
_ هما الي وصلوني ل كده كان هيحصل ايه لو سابونا مع بعض مبعدوناش اديها خسرت ابنها وخسرت جوزها واتشلت ومبقتش تتكلم ....
فجأه ببص عالست لقيتها بتعيط ب حرقه جريت عليها واتأسفتلها.....
_ انا سمعاكي امبارح بتتصلي بيه وتتفقوا علي حاجه انتي ناوية تعملي ايه بظبط....
_ هو ناوي يجي يقتلها النهاردة ويخلص منها ....
_ الموضوع دا مش هيحصل غير علي جثتي .....
_ يعني هتعملي ايه الوقت فات خلاص ....
_ مفيش حاجه فاتت اتصلي بيه دلوقتي شوفيه فين بظبط....
وهي بتكلمه دخلت الحمام واتصلت بالشرطه وبلغت عن جريمه قتل هتحصل وادتهم العنوان....
وخرجتلها برة....
_ هاااا قالك ايه....
_ قال جاي كمان ساعة....
_ طيب كويس اوي.....
انا بس عاوزة اعرف انتي مخك كان فين لما فكرتي تمشي ورا واحد زي ده وتضيعي نفسك ومستقبلك....
بقت تسمع كلامي ومتردش خالص.....
عدا ربع ساعة ولقينا الشرطة جت عالبيت ودخلوا وحكيتلهم علي كل حاجة طبعا اتحفظوا علي اختي ونبهنا عالبواب لما يجي ميجبلهوش سيرة ان في شرطة فوق.....
وبالفعل بعد ساعة جه ودخل البيت ومسكووه
وخدوه هو واختي......
وانا روحت عالبيت وحكيت لماما وبابا كل حاجه......
_ يعني ايه يابسنت ضيعتي مستقبل اختك وخليتيها تتحبس.....
_ هي الي ضيعت نفسها ب عمايلها ياماما وبعدين انتي كنتي عوزاني اسكت لحد ما يموتوا الست الغلبانه كمان مش كفاية ابنها الي مات وجوزها ال اتقتل......
اختي غلطت ولازم تتحاسب وبعدين انتي كنتي فين من كل دا ازاي مكنتيش بتعدي تتكلمي معاها زي اي ام وسيباها كدا ومتعرفيش الي بيحصل ......
تاني يوم رحنا عالقسم وقبلنا ظابط المباحث وأكدلنا ان بعد التحقيق معاها انها غير متزنة نفسيآ وهتتحول علي مصحة نفسيه وكانت بتنفذ الي بيتطلب منها من الشخص التاني وان موت الشخص الاول خلاها تفقد السيطرة علي عقلها .....
والشخص دا هو الي هيشيل القضية كلها لوحده .....
لانها تعتبر واحدة مجنونة .....
وبالفعل اتحولت لمصحه نفسية ...
عدا سنة وبدأت هاجر تتحسن شوية وبدأت تستجيب للعلاج وبروح ازورها كل اسبوع اتطمن عليها......
وبالنسبة للشيطان التاني اتحكم عليه بالسجن المؤبد....
والست مامت الولد حولوها علي دار مسنين وبروح ازورها من وقت للتاني جايز تسامح اختي علي الي عملته.......
انا فخورة بالي عملته دا حتي لو اهلي شايفيين اني ضيعت مستقبل اختي لانه كان هيضيع اكتر لو كنت سكتت وكنا هنخسر روح بريئه تانية ملهاش ذنب تموت.
👈👈👈👈👈👈النهاية 👉👉👉👉👉👉👉
بالله عليكم فين تعليقاتكم الجميلخ ومتابعه للمدونه
ليست هناك تعليقات:
إرسال تعليق