هل تساعدنى؟؟ بقلم /نسرين خالد
 |
النهارده قررت ادور على اى حد احكى معاه.... ماهو انا مش هقدر احكى ال عيشاه لحد من اهلى او القريبين منى..
دورت فى طلبات المراسله عندى و لقيت ال بدور عليه.... واحد بيدعى الروحانيه😂 بيدخل يكلم البنات على انه شيخ و يفضل يسايرهم لحد مايوصل لل هو عايزه... عز الطلب 😈😈
فتحت معاه دردشه و كانت.....
اه صح نسيت اعرفكم على نفسى.... انا راضيه و حالياً فى التلاتينات...... و شكلى... ف انا اميل للبياض و جسمى بيميل للكيرڤى و وشى مدور و عندى غمازات خفيفه و طبق الحسن و عيون عسلى... حالياً لبسى واسع.... متحدثه جيده اقدر اكون صداقات فى ثوانى.... و كمان عندى نفس السرعه فى تكوين العداوات …….. و ماشاء الله عليا مغناطيس للناس التوكسيك😁 نرجع بقى للمحادثه😁😁😁
انا : السلام عليكم ورحمة الله وبركاته
ال عامل نفسه شيخ و هسميه احمد...
احمد : و عليكم السلام ورحمة الله وبركاته
انا : ممكن اعرف حضرتك باعتلى ليه؟
احمد : الصراحه انا بعتلك عشان حسيت انك فى حاجتى
انا لنفسى: آآه يا عم الحسيس 😂😂
انا : و حضرتك حسيت ازاى انى محتاجه مساعده؟؟
احمد : اصى انا روحانى.. و اقدر اعرف حاجات كتيررر
انا لنفسى : هو ال قرر انا ماظلمتوش
انا : انا فعلاً محتاجه لمساعده... بس هو حضرتك واثق انك هتساعدنى؟!
طبعاً احمد اخدته الجلاله و رد و هو بيعظم نفسه
احمد : طبعاً اقدر ده لو عليكى قبيله كامله انا اقوم بيهم.. انتى متعرفيش بتتعاملى مع مين
انا : تمام حضرتك... دلوقتى اعمل ايه؟
احمد : دلوقتى انا عايزك تحكيلى عنك كل حاجه من يوم ما اتولدتى
انا : بس انا مش هعرف احكى من يوم ما اتولدت اكيد
احمد : اقصد من اول ما ذكرتك توصل
انا : تمام... بص انا من عيله تقدر تقول نجمها عالى... بنشوف حاجات و مش كل البشر بيشوفها.... يعنى افتكر و انا صغيره حوالى ٤سنين.. كنت نايمه و النور مطفى مفيش غير نور الطرقه ال شغال... و فجأه شفت شكل وحده ادامى ملهاش ملامح غير ضحكه... مش لطيفه و شعر منكوش جداً... يومها جريت على اوضة بابا و ماما و نمت معاهم للصبح
احمد : خوفتى؟؟
انا : لا بس كانت عايزه تلعب و انا عايزه انام ف سبتها و رحت نمت مع بابا وماما 😁
احمد : يعنى انتى ماخوفتيش منهم؟؟
انا : لا ماخفتش و معرفش ليه... يمكن عشان طفله... يمكن عشان ما أذتنيش.. مش عارفه ..... و بعد كده عدت السنين... بس ديما كنت بحس مثلا لو انا فى البلكونه لوحدى.. حد واقف جنبى.. و كنت بلاقى فلوس كتير جداً و انا ماشيه... ولو معايا ناس محدش بيشوف الفلوس غيرى... و كبرت و اشتغلت فى مكتب تسويق عقارى.... ولانى بطبعى فضوليه.... و فضولى اخدنى للماورائيات..... كنت بحب اقراء قصص عنها... و لجل حظى السعيد 😏فى حد كان مؤذى كتب قصه و دس وسط كلامها طلاسم... و بما انى كنت مخلصه شغلى قلت اقعد اقراء شويه فى القصص و جت تحت ايدى القصه دى.. كنت فى فترة بعد المغرب و ابتديت قراءه و عدى عليا كنت بحسب غلط فى الكتابه..... و بما انى منخته ف كنت بقراء ب صوت😁.... خلصت قراءه و قمت من مكتبى عشان اعمل حاجه اشربها....و فجأه النور قطع و الدنيا اسودت و حسيت حد شنكلنى على الارض... و كانت الوقعه آخر حاجه افتكرتها.... فوقت من الاغماء بعد حوالى نص ساعه لوحدى و من بعدها بقيت اشوف خيالات و اسمع اصوات.. ودى طبعا حاجه كانت بتضايقنى.... و كان معانا فى الشغل واحد كبير فى السن لاحظ ال انا فيه و حاول يساعدنى و فعلاً ال بيحصل خف جداً لدرجة كنت بحسبه انتهى
احمد : آآآه شكلك حضرتى حاجه عن جهل منك🤔🤔🤔... و بعدين ايه حصل؟!!
انا : فى الوقت ده اتقدملى واحد... و ابتدت الخيالات تظهر تانى و للاسف الراجل الكبير ال كان بيساعدنى توفى فجأه😢😢... بعد كده قررت اصارح خطيبى... و الحقيقه هو خاف و فسخ الخطوبه😂😂😂😁
احمد : ليه؟ خاف من ايه؟؟
انا : ابدا هو كان عنده ارض فى بلده .. ارض زراعيه و كان مسافر هناك.. و اكتشف فى ارضه بوابة آثار... و عشان كده خاف😁
احمد : برده مش عارف خاف من ايه؟
انا : هو ماخافش من ال لقاه... هو خاف لانه مكنش قالى عن الموضوع ده.... و بعد مده جالى زياره و احنا قعدين مع بعض لقانى بقوله
فلاش باك
انا : بقولك... ايه اخبار البوابه ال لاقتها فى ارضك؟؟
خطيبى : بوابة ايه؟؟
انا : بوابة الآثار ال لاقتها فى ارضك
و ابتديت اقوله على شكل البوابه و علامه فى ارضه... و كمان شكل الغرف بتاعت المقبره و ال اتأكد من الشكل بتاعها بعد ما الخبراء اكدوله ان كلامى صح
نهاية الغلاش باك
انا : و طبعا خطيبى مشى من عندى و تانى يوم بعت ل اهلى انه فسخ الخطوبه😁😂
احمد : و اتخطبتى تانى؟؟
انا : اها و اتجوزت كمان...
احمد : اتجوزتى؟؟ اممم كويس.. و بعدين؟؟
انا : اتجوزت من هنا... ال شفتو بعد كده لا يخطر على باال بشر
احمد : حصل ايه؟؟ 🤔
انا : ابدا بقيت اقوم من النوم القى نفسى متعلقه بين السرير و السقف.. و وقت تانى اقوم من النوم على سخونيه و كأنى فى فرن.... ابتدا مشاكل كتير بينى و بين زوجى و حاجات تختفى..... و المشاكل تزيد و ابتديت اشوف وش زوجى بشع
احمد : بشع ازاى؟؟
انا : عيون مشقوقه ب الطول و وش شبه الكونو و ودان طويله و فم مشقوق ب لحد قرب الودان.... كنت افضل اسرخ لحد ما يغم عليا.... و ابتدا كمان يظهرلى قطط و اشخاص فى البيت
احمد بنبره مهزوزه بخوف : يظهرو ازاى يعنى؟؟
انا : ابدا كان فى اشخاص بيطلعو من حيطه يدخلو فى حيطه و ال يعدى يقولى سلام عليكم و يدخلو الحيطه او يختفو... عادى يعنى😂😂
احمد : وبعدين حصل ايه تانى؟؟
انا : ابدا... ابتدا يظهر حد تانى فى حياتى
احمد : حد مين؟؟
انا : چن عاشق...
احمد : و ازاى حصل؟؟
انا : ابدا فى شيوخ قالو بسبب انى بقعد كتير ادام المرايه.... و فى ال قال ان حد كان حابب يأذينى.... 😢... و عرفت انه ملك عشيره و انه اخترنى زوجه 😁😁😁😁😁😁😁
احمد : و بعدين؟؟
انا : ابتدا يحصلى منه مدايقات و لَمـ░ـسـ░ـآتـ░ـ و وصلت ل آلَتـ░ـحـ░ـرٍشـ░ـ 😓😢😭 .... و كان كل شيخ يجيبه جوزى كان مصيره الجرى و يرفض يرجع تانى.... انا شفت سنين معاناه و عذاب😭😭😭
احمد : اممن و ايه حصل تانى؟؟
انا : قبل ما اكمل.... انت متأكد من انك هتساعدنى؟؟
احمد : طبعاً انا كفئ بيه 🤨🤨
انا : تمام... فضل ورانا لحد ما تطلقت من جوزى......
احمد : و حاليأ؟؟
انا : حالياً انا مش موافقه على حبه ليا.... و آآآه نسيت اقولك حاجه مهمه
احمد : ايه؟؟
انا : نسيت اقولك انه بيغير عليا بجنوون من بنى آدم 😂😂😂😂
و كانت آخر حاجه ظهرت قبل ما عمل بلوك و اقفل الفون
احمد : س ا ب ث م ى ش (ص♕꧁ةخخ꧂زةىلا ما ان رد
النهايه
رايكم يا جماعه انفع فى الرعب ولا ايه؟؟!
ليست هناك تعليقات:
إرسال تعليق