رواية وعد مر الحلقة الرابعة بقلم محمود عبد العزيز حصريه وجديده علي مدونة نجوم ساطعه
 |
صحيت على صوت حد بيصرخ، قمت بسرعة وطلعت برا الاوضة
لقيت عم صلاح واقع على الارض ووعد جنبه بتعيط .....
اتصلت بالاسعاف على طول وفضلت أهدى فى وعد وقلتلها ان شاء الله خير ،هما شوية تعب زي المرة اللي فاتت......
عم صلاح كان بيفتح عينيه بالعافية، انا كنت حاسس انه بيطلع في الروح خلاص، وكان مسك في ايدي جامد وكنت حاسس بيه عايز يقولي حاجة.....
وصلت الاسعاف واتنقل على المستشفى وانا ووعد معاه....
الدكتور طمني وأكد عليا ان العملية مش هتستنى لسنة، ولو متعملش في خلال شهر هيموت....
قعدنا اليوم كله في المستشفى وتاني يوم اخذت اجازة من الشغل ووصلت عم صلاح لحد البيت،
دخل عشان ينام، وقلت لوعد انا مستنيك برا، عشان عايزك في موضوع......
قررت ساعتها انى لازم اقولها....
خرجت وعد وسألتنى موضوع ايه؟؟
مكنتش عارف ابدأ ازاي؟! ولا اقولها ايه؟
بس كان لازم تعرف....
قلتلها أبوكى تعبان ولازم يتعمله عملية
ردت بصدمة تعبان عنده ايه؟؟ وعمليه ايه؟؟
حكيتلها التفاصيل ووعد كانت بتسمع وبتعيط، بس انا طمنتها ان العملية نسبة نجاحها عالية، بس المشكلة كلها في الفلوس......
قالتلي انا بابا كان شايل فلوس عشان جوازي خذها...
وقلعت الخاتم بتاعها والسلسلة اللى لابساها وقالتلي خذ دول، وانا هنزل اشتغل من بكره ونعمله العملية...
عيطت وعد وقالتلى بابا لو مات انا هأموت وراه....
طمنتها وقلتلها احنا هناخذ الفلوس اللي شايلها عم صلاح على الفلوس اللي معايا ونحجز العملية، ونحاول نستلف الفلوس الباقية ونبقى نسدد فيهم براحتنا.....
قالتلي ماشي، ودخلت جابت الفلوس واخذتها منها و سافرت على القاهره، اخذت الفلوس اللي معايا وبقى معايا ٧٠ ألف جنيه....
رحت المستشفى وحجزت العملية، واخدت معاد بعد أسبوعين، بس كان لازم في خلال الاسبوعين دول ادفع ال ٤٠ ألف الباقين.....
وصلت البيت وعرفت وعد وعم صلاح انى دفعت الفلوس، وان شاء الله في خلال اسبوعين هتتعمل العملية...
عم صلاح قالي ليه كده ياابنى؟؟؟؟
احنا مش اتكلمنا في الموضوع ده اكتر من مرة؟؟؟
قعدت وعد على الأرض جنب السرير اللى نايم عليه ابوها ،ومسكت إيده وقالتله هو ايه ليه يا بابا؟؟
انت عايز تسيبني لوحدي؟!!
مش كفايه أمى سابتني، انت كمان عايز تسيبني؟!
انت عارف اني مليش حد في الدنيا دى غيرك، وبدأت تعيط، وقالتله انت لو جرالك حاجة انا هموت بعدك....
ابوها حضانها وعيط هو كمان....
انا بصراحة مقدرتش افضل واقف وطلعت برا، وبعد نص ساعه طلعت وعد من الاوضة وجات قعدت معايا وسألتنى الفلوس الباقية بتاعت العملية هنجبها ازاى فى اسبوعين؟؟
قلتلها هحاول أشوف حد يسلفنا فلوس، وان شاء الله هسددها على سنتين بالكتير،
قالتلي طب مين اللي هيسلفنا؟؟
قلتلها سيبيها على الله...
قالتلي طب انا هاسيب الكلية السنة دي وهنزل اشتغل، والسنه الجاية هأبقى ادخل الامتحانات
قلتلها لأ....طبعا انت هتروحي الكلية والموضوع ده متشغليش بالك بيه اصلا.....
المشكله ان انا كنت بطمنها وانا مش عارف انا هعمل ايه؟!!
سبتها ودخلت الاوضة وبدات أفكر في الناس اللي ممكن أستلف منهم، وافتكرت الشبكة بتاعتي انا كنت جايبها ب ١٠ آلاف جنيه،
اتصلت بأمي وقلتلها كلمي اهل ندى عشان أخذ الشبكة بتاعتي
قالتلي بس انت اللي سايبها يا ابني، يعني الشبكة من حقها
قلتلها ما أنا عارف، بس هم مش هتفرق معاهم يعنى ،خصوصا انى محتاج فلوس جدا خلال اسبوعين.. سألتني محتاج فلوس في ايه؟
حكيتلها كل حاجة و ان العملية لو اتأخرت عن اسبوعين الراجل ممكن يموت....
امي مكانتش عايزة تكلمهم، بس بعد ما عرفت ان المسالة حياه او موت، قالتلي هاتصل ببهم وهاحاول معهم.....
قفلت معها ورحت على الشغل واتكلمت مع امير وقولتله انى محتاج ٤٠ ألف جنيه فى خلال أسبوعين، سكت شوية، وقالي انا كل اللي شايلهم ٥ ألاف، عشان كنت ناوى اطلع انا والعيال مصيف، بس يتأجل للسنة الجاية يعني مش مشكلة....
خذ الفلوس وانا احاول اتصرفلك في اي حاجة تانية....
رغم ان الفلوس كانت اقل بكثير من اللي انا محتاجه، بس كنت فرحان لاني حسيت انها هتبدأ تتحل
روحت البيت لقيت وعد قاعدة على السطح سألتها عم صلاح فين؟؟
قالتلي نزل الشغل
قلتلها ازاي يعني؟
قالتلي أنا فضلت اتحايل عليها عشان يريح الأسبوعين دول لحد معاد العملية، بس قالي انه لو قعد في البيت هيتعب اكتر ولازم ينزل الشغل.....
سألتني عملت ايه؟؟
قلتلها جمعت ٥ آلاف وممكن بكرا اجيب ١٠ آلاف
قالتلي طب والباقي؟؟
قلتلها لسه هفكر وربنا يسهل....
سبتها ورحت الاوضة غيرت هدومي وقعدت استنيت لحد ما عم صلاح رجع ،واكلنا مع بعض......
مر كام يوم لحد ما أمي ردت عليا وقالتلي انا كلمت ابوها وقالي في الاول انه موافق يرجع الشبكة،
بس ندى كلمتني بعد كده وقالتلي ان الشبكة من حقها، وقالت كلام كتير فيما معناه اني ما اتصلش بيهم تاني، و بصراحه مرضيتش أكلم ابوها تاني، لاني عارفه انه ميقدرش يرفض لبنته طلب.....
عموما يا ابني انا كنت شايله ١٠ الاف على جنب ،خذهم ولما ربنا يفكها نبقى نتصرف
قلتلها بس الفلوس دي انتى كنتى شايلها عشان جهاز اختي !!
قالتلي الجواز يستنى شوية، بس العمر مبيستناش......
قفلت مع أمي وكنت متضايق جدا من اللي ندى عملته ،وحمدت ربنا ان موضوعي معاها مكملش...
عدي الاسبوع الأول وانا مش عارف اعمل ايه؟؟ ولا اكلم مين؟؟
خلاص مش فاضل غير أسبوع واحد وناقص ٢٥ ألف، هجيبهم منين ؟؟
قبل ما اسافر القاهرة بيوم ، خلصت شغل وطلعت على البيت لقيت وعد قاعدة بتعيط، واول ماشافتني مسحت دموعها....
سألتها مالك؟؟
قالتلي مفيش....
قلتلها ابوكى حصله حاجة؟؟
قالتلي لأ هو نايم جوا
قلتلها طب ايه اللي حصل؟
وبعد محاولات كتيره بدأت تحكى، وقالتلى انا نزلت شغل من ٣ ايام في محل، ومرضيتش اعرفك ولا اعرف بابا، وبدل ما كنت بروح الكلية الصبح، كنت بروح الشغل وكنت ناويه أاجل السنة دي من الكلية عشان اقدر اساعدك في مصاريف العملية....
قلتلها وانت مين اللي طلب منك كده؟؟؟؟
لقيتها عيطت وقالتلي انا حكيت للرجل صاحب المحل على ظروفي وقالي انه هيديني مرتب ٣ شهور كمان اسبوعين، عشان العملية وبعدها هيبقى يخصمهم مني ،بس هو حس اني محتاجة الشغل، وكان بيعاكسني كل يوم والنهاردة زودها معايا، وانا معرفتش اتكلم.....
قمت وقولتلها وانا بزعق انتى ازاي تنزلي شغل من غير ماتعرفيني او تعرفي ابوك؟؟؟
لقيتها وقفت وقالتلى وهي بتعيط وطي صوتك بالله عليك عشان بابا مايسمعش،
بدأت اتمالك اعصابي وقلتلها الشغل ده مش هتنزليه تاني والكلية هترجعيها
قالتلي حاضر......
قلتلها اوصفيلي عنوان المحل اللي كنتى شغالة فيه
قالتلى ليه؟!!
قلتلها قولى العنوان واسكتي...
عرفت منها المكان واتصلت بأمير وحكيتله الموضوع وقلتله انا عايز انزل للراجل ده
قالي متقلقش استني بس لحد بليل تكون الحركة فى الشارع خفت شوية وننزل عليه
وفعلا استنيت الليل وأمير عدى عليا بعربية مأجرها ونزلنا على المحل
مكنش فيه الا صاحب المحل و٣ بنات شغالين...
أمير فضل واقف برا عشان لو حد جاي، وانا اول ما دخلت رحت ماسك استاند عليه برفانات وبضاعة ووقعته على الارض والحاجة كلها اتكسرت
لسه الراجل بيتكلم ،رحت مسكته من رقبته وفضلت خانق فيه وقولتله فى حساب ٣ ايام شغل بتوع وعد، انا عايزهم.....
الراجل مكنش عارف يأخذ نفسه، ووشه إحمر جامد.....
سبته وفضلت واقف جنبه لحد ما طلع الفلوس...
ضربته باليد في وشه ووقع على الارض،
نزلتله ومسكته تانى من رقبته وقلتله لو وعد قالتلي انك شفتها بالصدفة في الشارع وعينك جات في عينيها، انا هاجي تاني بس مش هكسر استاند واحد ، انا هكسرلك المحل كله....
ولو بلغت البوليس انا هعملك فضيحة كبيرة،
طبعا فاهمنى؟!........
الراجل فضل ساكت مابيتكلمش وهز رأسه بس...
سبته ومشيت وانا طالع فى بنت من اللى شغالين قربت منى عشان صاحب المحل مايسمعهاش وقالتلى وربنا انت جدع عشان ده شخص واطى اصلا ....
طلعت على البيت عشان احضر شنطتى واسافر على القاهرة، وانا نازل لقيت وعد طالعة من أوضتها عشان تسلم عليا
اديتها الفلوس بتاعتها ...
سألتني ايه دول؟؟
قولتلها حق ال٣ ايام اللى اشتغلتيهم
انا مكنتش رايح عشان الفلوس، بس اخدتهم منه عشان اعرفه ان انتى حقك مش بيضيع، ولو ضايقك تانى فى اى وقت عرفينى، رغم انى متأكد انه مش هيعملها تانى.......
وعد كانت واقفة بتسمعيني وحسيت انها دمعت وقالتلي طب خليهم معك عشان السفر، قلتلها لا انا معايا
خليكة بس جنب ابوكى وانا ان شاء الله هرجع من القاهره و معايا ١٠ آلاف مع ال ٥ الاف اللي هنا ، وهروح ادفعهم فى المستشفى وهاحاول مع الدكتور انى أمضى وصولات أمانة بالمبلغ الباقي، بس يارب يوافق
سبتها وسافرت قعدت مع أمي يومين وأخذت منها الفلوس ورجعت على اسكندريه،لقيت وعد قاعدة مستنيانى....
قالتلي انا رحت لعمى عشان أطلب منه باقي المبلغ بتاع العملية، بس قالى انه ممعهوش فلوس اليومين دول، ماطولتش عنده ونزلت، وخالد ابن عمي كان أول مره يشوفني من سنين طويلة، وعرض عليا انه يوصلنى بس انا رفضت......
قلتلها مكنتيش تروحي اصلا، انا قلتلك انى هتتصرف....
قالتلي انا شايفة الوضع يا أحمد واسبوع عدى من الأسبوعين واحنا مكملناش نصف المبلغ الباقي حتى، وانا مش هقف اتفرج على بابا وهو بيموت، انا لازم أعمل حاجة.........
وعد كان عندها حق، انا كل شوية اطمنها وانا اصلا قلقان، ومش عارف هجمع باقي الفلوس ازاي؟؟؟
قربت منها وقلتلها متقلقيش ياوعد عم صلاح هيعيش وهيحضر فرحنا ان شاء الله ،وهو اللي هيربى العيال كمان.....
ابتسمت وعد ابتسامة حزن او ابتسامة أمل ،بصراحة ملامحها مكانتش باينة هي فرحانه ولا زعلانة،
وقالتلي يا رب يا احمد، يارب......
خلصت كلام معها ودخلت نمت، وتاني يوم نزلت على الشغل وانا راجع لقيت ناس خارجه من عند وعد
(شاب ومعاه ست كبيرة، شكلها امه)
وهما نازلين الشاب ده بصلى اوى كأنه يعرفني، حسيت انه عيل رزل ،مقالش حتى السلام عليكم.....
نزل على طول
سألت وعد مين دول؟؟
قالتلي دى مرات عمي وابن عمى اللي كنت عندهم، وجايين يطمنوا على بابا.....
قلتلها يا سلام !!!!!
يعني مش عايزين يدوكى فلوس عشان تلحقى ابوكى قبل مايموت وجايين عشان يطمنوا عليه !!!!!!
قالتلي ماهما مش جايين عشان يطمنوا عليه بس....
قلتلها أمال جايين ليه؟؟
سابتني وقعدت على الكنبة وفضلت ساكتة....
رحت قعدت جنبها وقلتلها جايين ليه؟؟!!!
بصيتلي و قالتلي
(خالد عايز يتجوزني وأمه وفتحت معايا الموضوع، وقالتلي ان فلوس العملية هتكون المهر بتاعي)
بس انا حكيتلها عنك وقلتلها انك اتكلمت مع بابا وهو وافق، بس قالتلي انتو لسه ما اتخطبتوش وكل شيء قسمة ونصيب ،وقالتلي ان جوازي من ابنها هيخليني أعرف أعمل عملية بابا
كنت بسمع الكلام وانا متعصب وقلتلها يعني هما معاهم فلوس عشان ابنهم يتجوز وممعهوش فلوس عشان يسلفوكى؟!
قالتلي ما انا قلتها تسلفنى الفلوس وانا والله هسددهم، بس هى قالتلى متزعليش مني يا بنتي دي فلوس الجواز ،وبعدين كل حاجة هتتحل لو انتى وافقتى على الجواز، وقالتلي انها هتسبني يومين أفكر
قمت وقفت وقلتلها بصوت عالي تفكري في ايه؟؟
انتى ازاي اصلا ما طردتيهاش ؟؟
لقيت وعد ساكتة وبتبصلي
فضلت باصصلها شوية وحسيت ان اعصابي سابت،
قعدت جنبها وقلتلها بصوت واطي انت ناويه تفكري في كلامها؟؟
فضلت ساكتة وعنيها مليانة دموع،
وقالتلي انا كل اللي بفكر فيه هو بابا، حتى لو أنا هموت مش هتفرق معايا، المهم بابا يعيش......
فضلت ساكت وباصصلها ومش مصدق إنها ممكن تضيع مني عشان شوية فلوس، وفي نفس الوقت عارف يعني ايه ابوها يموت وهي في إيديها انها تنقذه
قربت منها وسألتها بصوت واطي هتتجوزيه وتسبينى يا وعد؟؟؟
بصت فى الارض شويه وبعدها بصتلى وعينيها مليانة دموع وقالتلى ........
يتبع ........
لو انتى مكان وعد هتختارى ايه
تعليقات
إرسال تعليق