رواية وعد مر الحلقة الخامسة حصريه وجديده علي مدونة نجوم ساطعه
 |
رواية وعد مر الحلقة الخامسة حصريه وجديده علي مدونة نجوم ساطعه
وعد_مر
الحلقة الخامسة
بصت وعد في الأرض شوية وبعدها بصتلى وعينيها مليانة دموع وقالتلى....
انا بحبك يا أحمد......
وزي ما أنا عايزة بابا يفضل جنبي، انا عايزاك انت كمان تكون معايا.......
أنا فرحت جدا بكلامها ،أول مرة افهم يعني ايه كلمة بحبك رغم الظروف اللي احنا فيها بس الكلمة كانت مخليانى طاير من الفرحة.....
قلتلها سيبيها على الله مش هيعدي الأسبوع الا لما أجمع الفلوس والعملية تتعمل....
سبتها ودخلت وانا دماغي هتنفجر يعني ايه مش عارف اجمع 25 الف جنيه ؟!!!!
وعد حاطه كل أملها عليا، ورفضت الحل السهل انها تتجوز.......
طب هقولها ايه لو ابوها مات بسبب الفلوس؟!
هبص في وشها ازاي اصلا؟؟
عدى عليا ٣ أيام والعملية قربت وانا مش عارف أعمل حاجة، حتى لما رحت المستشفى عشان أحاول أقنع الدكتور انى أمضى وصولات أمانة بباقي المبلغ ،رفض وقالي مش هدخل أوضة العمليات الا والفلوس كلها مدفوعة......
الابواب كلها اتقفلت في وشي......
كلمت أمير تاني، رغم اني عارف انه ممعهوش، بس قلتله يفكر معايا
قالى انى ممكن اخذ قرض بس المشكلة لازم يكون عندك حاجة كضامن للبنك، وسكت شوية وقالي هو في حل تاني بس انا مكنتش عايزها توصل لكده...
قلتله حل ايه ؟؟؟؟؟
قالي هناخذ ال ٢٥ ألف من واحد عندنا في المنطقة بس هنسددهم ٤٥ ألف فى خلال سنة، ولو اتاخرت المبلغ هيزيد كمان......
قلتله لأ طبعا انا مش هخذ فلوس بالربا، وبعدين ده مش هيبقى ربا بس، دى سرقة كمان،
يعني ايه يأخد نسبة اكتر من ٧٠% في سنة واحدة؟!
قالي طب هتعمل ايه؟؟
قلتله مش عارف، سيبها على الله ولو اتقفلت خالص هشوف الحل بتاعك
اول ما روحت البيت لقيت وعد قاعدة مستنيانى وفرحانة جدا، اتفاجئت لما شفتها مبتسمة ، من ساعة ما عرفت ان ابوها تعبان وانا شايفها مطفية ودبلانة وساكته معظم الوقت، وكانت أول مرة اشوفها فرحانة......
سلمت عليها وانا مبتسم وفرحان بيها وسألتها ايه اللي مفرحك كده؟!
قالتلي خلاص رحت دفعت باقي الفلوس في المستشفى،
استغربت وقلتلها جبتى الفلوس منين؟!!
قالتلي أنا هقولك بس متقولش لبابا دلوقتى، بعد ما يقوم من العملية نبقى نعرفه
قلتلها جبتى الفلوس منين؟؟
قالتلي في واحدة صاحبتى،عندها راجل في شارعها صاحب محل أجهزة كهربائية، اشتريت منه أجهزه ب١٠٠ ألف جنيه، بس مادفعتش فلوس ومضيت على وصولات أمانة اسددهم في خلال سنتين، وبعدين بعتله الأجهزة دي تاني وأنا واقفة ب ٤٠ ألف جنيه وأخدت منه الفلوس، ورحت دفعتها في المستشفى.....
انا وشى قلب وكشرت وقلتلها يعني ايه تأخذي منه ربا وسرقك كمان، اخذتى منه ٤٠ ألف وهتدفعيهم ١٠٠ ألف، وبعدين هنجيب منين ال ١٠٠ الف؟؟؟
لقيت الابتسامة اللي على وشها اختفت وقالتلي ما انا هأجل الكلية سنتين واشتغل، وبابا كمان لما يقوم بالسلامة ان شاء الله هيشتغل وهنحاول نسدد
قلتلها بصوت عالى انتى ازاي تعملى حاجة من غير ما تقولي لحد؟!!!
انت كان عقلك فين ساعتها ؟!!
عنيها دمعت وسابتني وراحت قعدت على الكنبة.....
قالتلي عقلي كان في بابا اللي انا شايفاه بيموت أدام عينيا وانا واقفة بتفرج عليه ومش عارفة اعمل حاجة
عاش حياته كلها شايل همي، ازاي لما يتعب مأشليش انا همه؟!!!
أنا مش متخيلة حياتي من غيره هتبقى عامله ازاي يا احمد؟!!
ازاى هرجع من الكلية واعمل الأكل واقعد استناه وفي الاخر ميجيش؟؟
ازاي لما تحصل حاجة معايا مزعلاني وأدور عليه عشان احكيله وفي الاخر ملاقيهوش ؟!
انا عقلي مكنش في بابا بس، انا عقلى كان في حياتي انا....
ازاي هعيش مطمنة وانا عارفة انى عايشة في الدنيا لوحدي؟!
انا كنت شايفه امي بتموت أدامي زي ما انا شايفه بابا دلوقتى ومعرفتش اعمل حاجة، ولو مكنش بابا موجود جنبى انا مكنتش هعرف أعيش....
بدأت دموعها البسيطة تتحول لعياط وقالتلي بصوت مكتوم بس لو بابا كمان سابني انا مش هعرف اعيش لوحدي.......
بعد ماسمعت كلامها إتحولت العصبية اللي انا فيها لضعف،
او متحولتش،
هي من الاساس كانت ضعف...
ضعف انى مش قادر أعمل حاجة....
ضعف لان وعد عملت اللي كان مفروض انا اللي اعمله ، وكانت قاعدة فرحانة ومستنيانى اجى عشان تفرحني، بس انا زعقتلها.....
أنا زعقتلها عشان خايف عليها....
رحت قعدت جنبها وقلتلها عم صلاح هيقوم بالسلامة ان شاء الله، ومهما حصل فاعرفي انك مش لوحدك، انا هفضل جنبك....
بصيتلي وعينيها لسه مليانة دموع وقالتلى ما انا عملت كده عشانك انت كمان.....
الفرصة الوحيدة اللي كانت أدامي عشان انقذ بابا هو اني اتجوز غيرك، بس انا معرفتش اتخيل حياتي مع حد تاني....
عشان كده مضيت على نفسى الفلوس، عشان فى أسوء الاحوال لو رحت السجن ،هيكون أهون عليا من موت بابا وأهون عليا من اني اعيش مع حد غيرك.....
انا عملت كده عشان عايزاك انت وبابا تفضلوا جنبي، مش عايزة حد فيكوا يسبني......
انا كنت متمالك أعصابي على أد ما اقدر، بس بعد كلامها مقدرتش افضل جامد ،وعيني دمعت وقلتلها محدش هيسيبك والعملية هتتعمل، وابوك هيقوم بالسلامة ان شاء الله ،وانا هشتغل صبح وليل والفلوس هتتسدد في معادها، وانتى مش هتسيبى الكلية، انتى في أخر سنه خلاص وهتبقى دكتورة، وبعد ما تخلصي ابقى اشتغلي لو عايزة، وكل ده هيخلص وهنعيش مع بعض كلنا.....
كلامي كان زي المهدئ بالنسبة لوعد ابتسمت وقالتلي يارب يا احمد يارب...
خلصت كلام معها ودخلت أوضتى وانا بفكر في كلامها....
عم صلاح لو جراله حاجة، وعد هتعمل ايه؟
وسألت نفسي ازاى هقدر أوفر ١٠٠ الف جنيه فى سنتين، وبدات أحسبها وتعبت من كتر التفكير، ونمت
تاني يوم رحت الشغل وحكيت لأمير
قالي طب ما انت بكره هتقبض وهتاخد ٤ ألاف على ال ١٥ اللي معاك وانا هديك الف يبقوا ٢٠ ألف تروح تدفعهم للراجل يبقي كده انتوا واخدين منه ٢٠ بس بدل ٤٠ يعني لو على نفس النسبه يبقى هتسدد ٠٥ الف بدل ما تسدد ١٠٠ وكده هتبقى سهلة ان شاء الله، كل سنه ٢٥
استنيت تانى يوم لحد ما قبضت ورحت لوعد سالتها على عنوان الراجل اللى اخدت منه الفلوس...
ورحت واتكلمت معاه، أول ما شفته كنت حاسس اني شايف شيطان، وشه عليه غضب ربنا ،ولابس خواتم كتير وسلسلة وماسك الشيشة في إيده
قلتله انا هدفعلك ٢٠ الف عشان تقلل الدين من على وعد.....
قالي تمام، كده هيبقى فاضل عليها ٨٠ ألف
قلتله ازاي يعني لما ارجعلك ٢٠ يبقى هي كده واخده منك ٢٠ بس، وبالنسبة بتاعتك دى يبقى هتسدد ٥٠ ألف
قالي معلش يا استاذ بس انا كده استفدت ايه؟؟
انا كنت هاخذ ١٠٠ ودلوقتي هاخد ٧٠ بس، ٢٠ دلوقتى و٥٠ على سنتين، انت ترضالى الخسارة يعني؟؟
قلتله يعني هى واخده منك الفلوس من يومين وبترجعلك نصهم دلوقتى وعايز تأخذ عليهم نسبه برضو؟!!!!
وبعدين انا أول مره اسمع عن نسبة ١٥٠% .....
ضحك وقالي ده عشان خاطر الدكتورة بس، انا ساعات بأخذ ٢٠٠% كمان، بس عشان هي حكيتلي ظروفها، قلت ابقى رحيم معاها،
ما أنا لازم أعمل كده وأساعد الناس فى زنقتهم ، عشان ربنا يكرمني.....
انا كنت حاسس في الاول انى شايف شيطان، بس بعد كلامه اتأكدت انه فعلا شيطان......
قمت وقفت وقلتله انت هتاخذ ال ٢٠ ألف وهتقطع الوصولات وهنكتب وصولات جديدة ب ٥٠ ألف بس، وانا اللي همضى مكانها....
ابتسم وقالي وانا ايه اللى يجبرنى على كده؟؟
حطيت ايدى على المكتب وقلتله انا اللي هجبرك على كده.....
ابتسامته اتحولت لضحك وقالي انت مش واخذ بالك انك واقف منطقتي، وجوه المحل بتاعي كمان!!!
يعني انا لو عايز ألبسك تهمة دلوقتى واوديك في داهية هعمل كده ،
ولا بلاش..... انادى على الرجالة اللي شغالة ويدوك علقة حلوة ويرموك برا وبرضو الدكتورة هتدفع الفلوس كاملة
أنا من رأيي انك تهدي وتحسبها بالعقل وبدل ماتبقى في السجن والدكتورة تبقى لوحدها ومتعرفش تسدد الفلوس وتدخل السجن هي كمان، فالاحسن ليك انك تخليك جنبها عشان تساعدها.....
والاحسن ليا انا كمان انك تبقى جنبها عشان اخذ فلوسي......
رغم اني مكنتش طايقه وكان نفسي اضربه بس كلامه كله كان صح....
وعد دلوقتى محتاجاني، وحتى لو عرفت اضربه واكسرله المحل، مش هتستفاد أي حاجة، ومفيش أي حاجة هتتغير، غير انى هدخل السجن......
فضلت باصصله وبفكر، وكان قرارى الاخير اني اخذ الفلوس بتاعتي واسيبه وامشى
بس قبل ما اخرج من المحل نادي عليا وقالي يا استاذ.....
لفيت وبصيتله.....
قالي بلغ الدكتورة انى حابس ٣ قبل كده ومعنديش اي مشكلة ان احبس الرابعة،
يعنى كل شهر تجيب ٤٢٠٠ جنيه والشهر اللي هتتأخر فيه هقدم الوصولات للنيابة
ديرت وشى وسبته ومشيت ،بس فهمت من كلامه انه حيوان ومش هيصبر عليها، وانى لازم كل شهر أحضر ال٤ الاف
انا حتى لو اشتغلت وماصرفتش جنيه لمده سنتين ،وده طبعا مستحيل، برضو هيكون اقل من القسط اللي هو محدده......
روحت على البيت وعدي اليوم وكده مش فاضل غير يوم واحد وعم صلاح يعمل العملية، رحت لعم صلاح وفهمته ان في واحد من أهل الخير بيحب يساعد ، دفعلنا الفلوس وهنسدد فيهم براحتنا بعد كده ان شاء الله....
فضل عم صلاح يدعيله.....
حسيت ان كده أحسن لانه لو عرف اننا واخذين الفلوس بالربا من الحيوان اللي كنت عنده ، وان وعد مضت على نفسها وصولات ،كانت نفسيته هتتعب، وانا كنت حابب اطمنه قبل العملية........
قبل مااخرج قالى استنى انا عايزك رجعت وقعدت معاه
قالي انت عارف ياابنى ان الأعمار بيد الله، ومش معنى انى مكنتش هعمل العملية اني كده هموت، ومش معنى ان هعملها اني كده هعيش....
كل شيء بيد الله، وانا لو جرالى حاجة مفيش حد هيبقى جنب وعد، وانا ماليش قرايب غير اخويا، وزي ما انت شايف كده ،معاه يساعدنى وواقف يتفرج عليا، كل اللي عمله انه بعت مراته وابنه عشان يطمنوا عليا....
فأنا مش خايف على عمري على أد ما أنا خايف وعد......
قلتله ملوش لازمة الكلام ده، انت هتقوم بالسلامة ان شاء الله.....
سكت شوية ودير وشه وقالي انت عارف يا ابني، انا عشت حياة صعبة ومريت بظروف كتير خلتنى اتمنى الموت اكتر من مرة، ويمكن اكون مت فعلا ،بس الحاجة الوحيدة اللي ربطانى بالحياة هى وعد.....
وعد مش بنتي بس ،
وعد تبقى روحي اللي انا عايش بيها.....
انا لما عرفت انى تعبان وهموت زي ما امها ماتت، خفت.....
رغم اني كنت بتمنى الموت بس خفت منه، وكنت بدعي ربنا ليل ونهار اني اطمن عليها قبل ما اموت، وانت لما جيت وكلمتني انك عايز تتجوزها، حمدت ربنا انه استجاب لدعائي
عشان كده لما عرضت عليا انى أحط الفلوس بتاعتك على الفلوس اللي انا شايلها لجوازها واعمل العملية، انا رفضت،
لان احساسي انى هفارق الحياة وانا مطمن اهم عندي من الحياة نفسها....
وبعدين دير وشه وبصلي شوية وقالى توعدني؟؟؟؟؟
قلتله أوعدك ب ايه؟
قالي اني بعد ما اموت تفضل جنب وعد على طول ،انت هتكون كل أهلها مش هيكون ليها حد غيرك ومش هتعرف تعيش في الدنيا لوحدها....
انا عارفها....
ابتسم وقالي انا عارفها هبلة ساعات، وممكن تزعل منها على حاجات تافهه، بس هي طيبه جدا... مش عشان بنتي بقولك كده.. لأ.......هي فعلا طيبة
يعني لو زعلتك مرة او ضايقتك متسبهاش لوحدها، هي معندهاش حد تشتكيله غيرك.....
اوعدني انى هموت وانا مطمن عليها....
انا فضلت باصصله ومستغرب ،هو ازاي مبتسم ومتمالك اعصابه هو بيقول كلام زي ده؟؟؟
بس انا مقدرتش أتمالك اعصابي ودمعت وقلتله اوعدك اني هفضل عايش جنبها لحد ما اموت انا كمان....
قالي انت عارف انا بتمنى العملية تنجح عشان حاجة واحدة بس، هي انى احضر فرحك انت ووعد،
الابتسامة اللي على وشه اختفت وقالي بس الحقيقة مش ده السبب الوحيد اللي أنا عايز اعيش عشانه، انا عايز اعيش عشان وعد هتوحشني لو مت .....
وبدأ يفقد اعصابه وعينه دمعت وقالى، انا اتعودت انى اشوفها أدامي على طول ، واتعودت اني أكل معاها ،لما كانت بتتأخر في الكلية مكنتش بعرف أكل لوحدي...
اتعودت انها تحكيلي مشاكلها، حتى المشاكل التافهه مع اصحابها انا كنت بسمعها بإهتمام......
كنت ببقي طاير من الفرحة لما اجيبلها حاجة، هي كانت طالبها مني واشوف أد ايه هى فرحانة.....
انا خبيت عليها تعبي عشان مش عايز اشوفها مطفية، عايزها تفضل على طول فرحانة.....
كنت حاسس دايما انى ظالمها وانها تستاهل عيشة أحسن من كده، وعارف انها تستاهل أب احسن مني، بس عارف برضو ان مفيش أب هيحبها اكتر مني......
سكت عم صلاح وفضل يعيط.....
رحت قعدت جنب وقلتله اللي عنده أب زيك لازم يفتخر به، ووعد لازم تحمد ربنا ان انت ابوها، وان شاء الله هتقوم بالسلامة وهنعيش كلنا مع بعض....
سبته ودخلت اوضتي وانا خايف...
طريقة كلامه حسستني انه أخر يوم في حياته
قعدت شويه وبعدها نزلنا كلنا على المستشفى، لازم عم صلاح يقعد يومين في المستشفى عشان يعملوا شويه تحاليل قبل العملية،
عدي علينا اليومين وانا بطلع من الشغل على المستشفى اقعد شوية مع عم صلاح ووعد وأسيبهم وأروح على البيت أنام، لحد ما وصلنا ليوم العملية....
فضلت قاعد انا ووعد في المستشفى ٤ ساعات لحد ما خلصت العلمية....
سبت وعد ورحت اسال الدكتور
بصلى وقالى........🙊🙊🙊😥
يتبع
تعليقات
إرسال تعليق