اسكريبت حصري خاص بمدونة نجوم ساطعه
❤️💙❤️💙❤️💙❤️💙❤️💙❤️💙
❤️💙❤️💙❤️💙❤️💙❤️
 |
اسكريبت حصري خاص بمدونة نجوم ساطعه
في يوم وانا مروحة بليل .. وأنا في أول الشارع بتاع البيت .. سمعت صوت كلب بيلهث
بدأت اسرع المشي عشان حسيت ان صوت انفاسه بيقرب مني
وبدأت أجري لقيت كلب أسود ضخم بيجري ورايه .. جريت بأقصى سرعتي
لحد ما وصلت باب العمارة لقيته مقفول مالحقتش اطلع المفاتيح كان الكلب جه وعضني في رجلي
صرخت جامد واغمى عليا صحيت بعدها وانا في المستشفى ولقيت اهلي كلهم موجودين
وامي بتعيط ومن الفرحه اني فوقت قعدت فترة اتعالج بعدها واخد حقن كتير
بعدها فضلت فترة كبيرة مانزلش من البيت ولا اروح في حته
قعدت شهرين في البيت ما بنزلش حرفيا وصحباتي هما اللي بيجولي ويذاكروا معايه
لحد ما الامتحانات قربت ونزلت عشان اروح الامتحان كان بقى لي كام يوم حاسه بصداع رهيب
مش عارفه مالي باخد حبوب فيتامينات وباكل كويس وبرده مصدعه .. بس الغريب وانا بحل في الامتحان
لاحظت ان ظوافر ايدي شكلها غريب .. بقت بتلمع اكتر من زمان وبقت طويله ايه ده انا لسه قصاه من اسبوع
لحقت تطول كده .. بعدها ركزت في الامتحان وحليت على قد ما اقدر وروحت وانا الصداع تاعبني جدا
لحد ما شميت ريحه في البيت حسيت اني نفسي فيها ... جريت عالمطبخ اشوف ايه ده
لقيتها ريحه لحمه ماما لسه جايباها من عند الجزار .. بدات لا اراديا اقرب منخيري من اللحمه واشمها
ريحتها جميله جدا وطازة .. انا مابقتش مصدقه انا بعمل ايه انا اساسا كنت بقرف من اللحمة لو مش مستويه كويس
❤️💙❤️💙❤️💙❤️💙❤️💙❤️💙
❤️💙❤️💙❤️💙❤️💙❤️
لقيت نفسي بتلفت اشوف في حد شايفني ولا لا .. بعدها مسكت حته اللحمه وعضيتها .. اتقطعت معايه بسرعه
حاسه ان أسناني بقت حاميه وبقطع اللحمة في بقي بسهوله .. خدت منها كمان حته .. لقيت الصداع راح
وحاسه اني بقيت احسن .. ما فوقتش غير وانا مخلصه اللحمة كلها .. وقومت جريت على اوضتي
ماما كانت هتتجنن وهي بتسال اللحمة راحت فين وانا بقنعها ان القطه هي اللي كلتها احنا عندنا قطه اسمها فيكي فضلت تحسبن ونزلت تجيب لحمه غيرها وماكنش في غيري في البيت
دخلت اوضتي وقفلت الباب وفضلت باصه في المرايه عيني بقى شكلها احلى وزني كان زياده زمان دلوقتي بقيت رشيقه اكتر
ببص لاسنان بقت بيضه وحساها بقت اقوى مع ان كان عندي حساسيه اسنان
انا مش عارفه اقول ايه لاهلي اقولهم حاسه اني لسه ما خفتش ولا اعمل ايه
مش عارفه افكر في حاجه دلوقتي غير اني جعانه .. فتحت باب الاوضه عشان انزل لقيت فيكي القطه قدامي
فضلت بصالها شويه كده .. حسيت حاجه غريبه جسمي منمل ولعابي بدا يسيل من بقي وشامه ريحه حلوه منها وفجأة ...
السعار الجزء الثاني
وفجأة لقيت ڤيكي بتجري ولقيتني بنط وراها ومسكتها قبل ما تنزل تحت الكراسي .
وقومت بلا احساس او تفكير عضاها من رقبتها فضلت تنوح جامد لحد ما ماتت .
وانا مش عارفه اتحكم في نفسي احساس قوي جدا بالجوع حاجه جواك .....
بتقولك ايه اللي بتعمله ده وشهوة تانيه اول مرة احسها مخلياني عايزه اكمل اكل فيها مش قادره اوقف متعة النشوة اللي حاسة بيها وانا باكل .
بعدها حاولت اوقف نفسي وفعلا رميتها من ايدي وجريت على الحمام غسلت ايدي وبوقي من الدم .. وبصيت في المراية لقيت هدومي كلها دم .
دخلت غيرت وقومت نازله من البيت مش عارفه اعمل ايه انا حاسه اني ممكن أأذي اهلي دلوقتي انا بقيت خطر لازم اروح المستشفى حالا .. خايفه ارجع البيت اشوف امي وهي شايفه القطه مقتوله والبيت غرقان دم .
روحت على مستشفى قريبه مني وخدت رقم كشف وفضلت قاعده مستنية دوري وحاسه بدوخة .. حاسة جسمي كله بيوجعني تاني .. وصداع رهيب والناس حواليا بقيت اشوف بعين مزغلله قومت طلبت اني ادخل الكشف بسرعه عشان تعبانه .
لقيت الناس كلها بتزعق وبتقولي في دور بنخش بيه واقعدي كلنا تعبانين .. فضلت قاعده وقررت ارجع البيت واهلي يتصرفوا معايه ماكنش المفروض انزل هما اكتر ناس هتساعدني انا كنت خايفه من رده فعل ماما لو شافت المنظر واني عملت حاجه زي دي ممكن تتئذي بسببي وخصوصا اني مش عارفه اتحكم في نفسي .
فضلت مستنية دوري والصداع بيزيد وصلت لمرحلة مش قادرة اتحرك وفجأة لقيتني برجع .. رجعت دم كتير ولقيت شعر القطه واجزاء منها نازله على الارض .
الناس في العياده كلها قامت تصرخ وطلعوا يجروا بره العيادة .. روحت فاتحه الباب عالدكتور وقولتله انا عيانه
بعدها وقعت اغمى عليا .
فتحت عيني لقيتني نايمة على سرير .. وفي محاليل متعلقة .. ببص حواليا لقيت اهلي برة الاوضه بيبصولي بحزن .
بعدها دخل دكتور لغرفتي .. وقفل سيتاره تمنع اهلي انهم يشوفوني ولقيته بيقرب مني بيسالني عندك كام سنه
قولتله 21 سنه .
قالي ايه اخر حاجه كلتيها .. قولتله قطه .
قام جايب حته لحمة مش مستويه بس متشوحه عالنار .. وقربها مني قالي حاسه بايه .
قولتله انا جعانه جدا خليني اكلها .. قالي دي مش مستويه اصلا ومافيش بني ادم يعرف ياكلها .
قولتله مش مهم ريحتها حلوة .. وجيت امد ايدي لقيت ايدي....
❤️💙❤️💙❤️💙❤️💙❤️💙❤️💙
❤️💙❤️💙❤️💙❤️💙❤️
السعار الجزء الثالث والاخير
وجيت امد ايدي لقيت ايدي متكلبشة في السرير الحديد .
هنا لا اراديا اتجننت .. قولتله هاتها باعلى صوتي .. وبدات احاول افك ايدي ورجلي اللي مربوطين فالسرير .
الدكتور بعد بحته اللحمة وقالي اهدي وبيحاول يديني حقنه مخدره وانا عماله ارفص مش عارف يديهالي .
كنت حاسه اني اتجننت خلاص لحد ما بدات اتعب وقام دخل اتنين دكاتره ثبتو ايدي واداني الحقنة بدات اهدى شوية .
قالي انتي محتاجه نقل دم كلي .. ودي عمليه صعبه اهدي وكله هيتحل عشان الوقت مش في صالحنا .
غمضت عيني وكنا الصبح فتحتها لقيتنا بليل وشامه ريحة اللحمة لسه .. فضلت احرك ايدي جامد بطريقة مجنونه .
لحد ما فعلا كسرت الحديده بتاعة السرير وقومت فكيت ايدي التانيه ورجليا وقومت مشيت ورى الريحة لقيتها في حمام الاوضه دخلت كلتها ..وحسيت اني لازم اهرب .. مش عارفه هما هيموتوني ولا بيعذبوني ولا بيعالجوني .
انا مش عايزة حاجه من حد انا حاسه اني كويسه وعايزة اعيش فتحت باب الغرفه بتاعتي لقيت اهلي نايمين على الكراسي جنب اوضتي .. اتسحبت ولقيت شنطه جنب ماما فيها هدومي خدتها وغيرت في الحمام وطلعت بره المستشفى اجري زي المجنونه انا ما بقتش طبيعية .....
بجري في وقت كنت بخاف افتح فيه شباك الاوضه بليل .. بجري لوحدي في شارع ضلمة .. لحد ما وقفني اتنين معاهم سلاح قالولي بتجري من مين دلوقتي ... يلا طلعي كل اللي معاكي بالزوق عشان ما تزعليش .
فضلت بصالهم شويه وفجأة قومت عضيت الولد ده من رقبته وبدا يصرخ وصحبه شاف المنظر طلع يجري ....
وانا فضلت عاضه رقبته واكل منها طعم تاني مختلف عن القطه .. حاسه بمتعة اكبر .....
بعدها فضلت قاعده على الارض ببصله ووببص لجسمي اللي متغرق دم .. أنا ما بقتش عارفاني حاسه اني غريبة عني
هوا انا صح ..... اجري ورى شهوتي اللي مسيطرة عليا ولا انا بستمتع بيها عشان كده مش عايزة اتعالج .....
انا بتحجج اني مش قادرة اقاوم فعلا ولا دا اخري .. ولا انا اقدر اصبر عالوجع لحد ما اتعالج .....
طب دي غلطه مين ؟؟
دي مش غلطتي دي غلطه الكلب اللي عضني .....
اروح الومه .. ولا احل الازمة اللي بقيت فيها بالعقل ....
بستكبر على مساعده اهلي ليه ؟
مش عايزة حد يساعدني وبشتكي ........
بس اخرة الطريق دا اي ؟!.....هسكت وهكمل فيه مش حلوة المرض بينتشر فيا كل يوم .........في حاجات بتصبرني شوية بس بعدها المتعة بتروح ......
انا لازم اقرر انا عايزة ايه .. ....اكمل اذية في الناس واللي حواليا بسبب غلطة ماحدش ليه ذنب فيها ......
ولا اتعالج وارجع كويسه واعيش حياتي طبيعيه .. انا حاسه ان ازمتي نفسيه مش جسديه صدمه الكلب والخوف .....
خلوني عايزة افتري على اي حاجه ....
عايزة اكون زيه ..... عايزة انتقم من اي حد ..... وهوا ده صح ؟؟!
غلطه غيرنا ننقلها جوانا في ناس تانيه .....
انا ما بقتش عارفه افكر بس اللي متاكده منه دلوقتي
اني لازم ما اضعفش قدام مرضي واتعالج
تمت
❤️💙❤️💙❤️💙❤️💙❤️💙❤️💙
❤️💙❤️💙❤️💙❤️💙❤️
تعليقات
إرسال تعليق