رواية زواج بحبر شفاف رواية للكاتب عادل عبد الله الحلقه الاولى والثانيه حصريه وجديده علي مدونة نجوم ساطعه
الحلقة ١
صوت رنة الموبايل يدق بينما كنت مشغولة بالمطبخ ، وما ان انتهت الرنة حتي اعاد صوته من جديد .
شعرت بانقباض لا اعلم له سبب !!! وعندما امسكت بالموبايل لأرد عليه كان علي الطرف الاخر من يخبرني بأن خالد زوجي في المستشفي بين الحياة والموت أثر اصابته في حادث سيارة مروع !!!
سقط الموبايل من يدي واصبت بحالة اغماء .
حين عاد لي وعيي وأفقت من الاغماء سألتني ابنتي خلود عما حدث فتذكرت المكالمة فقولت لها وانا أبكي : باباكي يا خلود عمل حادثة بعربيته وهو دلوقتي في المستشفي بين الحياة والموت .
اخذت خلود وجرينا علي المستشفي وهناك عرفنا ان زوجي خالد مات !!!
اصيبت بحالة انهيار من البكاء فلا أعرف كيف سأكمل حياتي بدونه .
وللحقيقة أن سبب حزني علي فراق زوجي لم يكن الحب ولكن خالد كان بالنسبة لي الضهر والسند في الدنيا .
فوالدي متوفي وليس لي اخوة رجال وعلاقتي بأعمامي منقطعة منذ سنين طويلة وخالي الوحيد توفي منذ سنوات قليلة .
لم اشعر يوما بالحب تجاه خالد فقد كان زوج قاسي عنيف فكان السباب والضرب هو اول رد فعل له علي اي موقف او حوار بيني وبينه .
لم يكن بيننا الا التعود والعشرة بيننا والتي كانت تتبخر حين يغضب وتتبدل الي سيل من السباب واللعنات وربما الضربات العنيفة .
والان اقف باكية وفي حضني ابنتي خلود التي تبكي والدها وانا في ذلك الموقف لا اعلم كيف اتصرف ومن سيقوم باجراءات الدفن والعزاء !!!
وفجأة شاهدت رشدي صديق زوجي أمامي ، كان مربوط الرأس واليد !!!
جريت عليه وقولتله : شوفت يا رشدي اللي حصل خالد مات .
رشدي : البقاء لله ، شدي حيلك ، علفكرة انا كنت معاه في الحادثة لكن هو عمره خلص وانا لسه ليا عمر سبحان الله .
: انا مش عارفة اي حاجة يا رشدي مش عارفة اعمل ايه دلوقت !!
: اهدي انتي يا هيام وانا هتصرف في كل حاجة .
وبعد اقل من نص ساعة كان وصل صلاح صاحب خالد التاني .
اول لما وصل قرب مني وقالي : البقاء لله شدي حيلك .
انا كنت ببكي جدا ومش متمالكة نفسي من الحزن والخوف ومش قادرة اتكلم او ارد عليه .
صلاح : خلاص يا هيام ارجوكي تهدي ومش تقلقي من اي حاجة انا معاكي ومش هسيبك .
: ربنا يخليك يا صلاح .
: انا هروح اخلص اجراءات شهادة الوفاة وتصريح الدفن .
: خلاص يا صلاح ، رشدي راح يخلصهم .
صلاح اتغيرت ملامحه واتضايق وسألني : هو رشدي كان هنا ؟
: انت متعرفش ان رشدي كان مع صلاح في الحادثة ؟؟
: لا ، اول مرة اعرف منك دلوقت .
: كان معاه في الحادثة وايده تقريبا مكسوره وعنده جرح في راسه .
: طيب قوليلي عنوان المدافن بتاعت عائلة خالد علشان ابلغهم يجهزوا كل حاجة .
: معرفش حاجة والله يا صلاح .
: طيب خلاص متشغليش بالك انا هتصرف .
وبعد حوالي ساعة كانت وصلت ياسمين زوجة رشدي و ندي زوجة صلاح ووقفوا معايا يواسوني .
مر اليوم ورشدي وصلاح خلصوا كل الاجراءات لغاية ما خلصت مراسم الدفن والعزاء ، و زوجاتهم هما الاتنين معايا انا وخلود لأخر اليوم .
انتهي العزاء ورشدي وصلاح عزموا عليا انا وخلود يوصلونا للبيت ، كانوا بيتسابقوا أن كل واحد منهم يظهر اهتمامه ووقوفه جنبنا اكتر .
وصلنا البيت كلنا وطلع رشدي وياسمين معانا البيت وكمان صلاح وندي طلعوا معانا وكانوا كلهم مش عاوزين يمشوا ويسيبونا لوحدنا . قولتلهم : خلاص يا جماعة كتر خيركم وقفتكم معانا النهاردة اكتر من الاهل .
صلاح : متقوليش كده يا هيام ، خالد مش كان بس صاحب عمري ده كان اكتر من اخويا ، انا لحد دلوقتي مش مصدق انه الله يرحمه مات .
رشدي : اوعي تقولي كده يا هيام ده واجب وفرض علينا ، انتي وخالد اخواتنا انا وياسمين ومن النهارده احنا اهلك ، اي حاجة تحتاجيها تقوليلنا عليها من غير كسوف .
: شكرا يا جماعة والله وقفتكم معانا دي بالدنيا كلها . حسستوني اني مش لوحدي انا وبنتي في الدنيا .
رشدي : ياسمين هتبات معاكي انتي وخلود النهارده وانا هروح ابات مع الاولاد في البيت .
في الوقت ده لاحظت ان صلاح كان عاوز ياكل رشدي بعينيه ومش عجبه كلامه !!
بعدها علطول صلاح قال : لا يا رشدي خد ياسمين وروحوا انتوا باتوا مع ولادكم في البيت وندي هتبات مع هيام وخلود .
رشدي كمان اتضايق اوي من كلام صلاح وقاله : يا عم صلاح هو انا كل ما هعمل حاجة عاوز تقلدني ؟؟
صلاح : هقلدك في ايه يا رشدي !!! انا بقول كده لأن انا وندي اولادنا عند خالتهم في اسكندرية علشان كده سهل ندي تبات مع هيام وخلود انما انت هتخلي ياسمين تبات معاهم وتسيب الاولاد ليه ؟؟!!
رشدي : وانت اي اللي مزعلك يا عم صلاح ؟؟ انت غريب اوي !!!!
: خلاص يا جماعة انتوا هتتخانقوا ولا ايه !! اتفضلوا انتوا مش عاوزة اسببلكم اي ازعاج وانا وخلود هنبات لوحدنا .
رشدي : مفيش اي ازعاج ولا حاجة ، بالعكس احنا لازم نفضل جنبك لحد ما تعدي ازمتك .
ياسمين ( زوجة رشدي ) : خلاص يا رشدي روح انت بات مع الاولاد و بكره الصبح هاتهم لأن انا هقعد مع هيام اليومين دول .
طبعا انا شعرت بحرج واضطريت اني اوافق .
وبالفعل رشدي مشي وبعده بدقايق صلاح وندي مشيوا لكن كان واضح علي صلاح الغضب ، وقبل ما يمشي ندي قالت انها هتيجي بكره الصبح تقعد معنا .
تاني يوم الصبح رشدي جاب اولاده و معاهم فطار كتير جدا لينا كلنا .
وبعد ما خلص شغله رجع رشدي علي البيت عندي و أول ما دخل سلم علينا وقعد شوية قالنا : تحبوا تتغدوا ايه نطلبوا دلوقتي ديليفري .
ياسمين : احنا اتغدينا خلاص .
رشدي : اتغديتوا ازاي وامتي ؟!!!
ياسمين : صلاح كان هنا من ساعتين وجاب غدا واتغدبنا كلنا مع بعض .
رشدي غضب جدا وكان شرر الغضب بيطير من عينيه .
وبعد ايام رشدي قالي : علفكرة يا هيام انتي لازم تعملي اعلام وراثة علشان اجراءات المعاش والميراث .
: ايوه اكيد لكن انا مش عارفة اي حاجة من دي .
رشدي : متخافيش انا معاكي يا هيام وهساعدك في كل حاجة .
: ربنا يخليك يا رشدي ، انا مش عاوزة اعطلك لأن الاجراءات دي اعتقد بتاخد وقت طويل .
: ولا يهمك يا هيام ، حتي لو هاخد اجازة من الشغل خالص مش مهم .
رشدي من زمان كنت متأكدة انه معجب بيا ، كان دايما لما بنتجمع وييجي عندنا مع ياسمين او لما كنا بنروح عندهم انا وخالد الله يرحمه كان بيركز معايا اوي واشوفه وهو بيدقق في ملامحي ولما كنت بلاحظه كان بيبتسم ودايما كان بيركز معايا في كل حركة بتحركها وكل تصرف بعمله !!!
بصراحة طول عمري كنت متأكدة من كده لكن عمره ما عاكسني ابدا ، رغم انه شكله كويس و محترم وبيتعامل بمنتهي الشياكة وكنت اعرف من خالد ومن ياسمين مراته كمان انه له تجارب وعلاقات لكن مع كل ده عمره ما فكر يخون صحبه .
بعكس صلاح اللي كان دايما بيعاكسني كل ما نتجمع انا وخالد عندهم او لما كان بييجي هو وندي في البيت عندنا !!! كان بجح اوي وقليل الادب اوي لدرجة انه اتحرش بيا قبل كده !! وكنت هقول لخالد لكني خوفت لأن خالد الله يرحمه كان مجنون وممكن يتهور ويعمل اي حاجة .
كتير حاولت اقنع خالد اني مش اروح معاه عند صلاح ومراته لكن خالد كان بيصمم اني لازم اكون معاه .
وواضح علي صلاح انه لسه بيفكر فيا وكمان رشدي انا متأكدة انه لسه بيفكر فيا .
وفعلا كلمت رشدي وقولتله : خلاص يا رشدي لو فاضي يوم الخميس الجاي نروح نعمل الاجراءات .
: ماشي يا هيام ، ولازم خلود بنتك تيجي معانا علشان اعلام الوراثة هيكون فيه اسمك واسم خلود واسم نادر اخو خالد .
: نادر !!!!! واسم نادر معانا ليه ؟
: علشان خالد خلف بنت واحده ومفيش اولاد ذكور يبقي اخو خالد هيدخل كوريث معاكم في اي حاجة .
: واحنا هنجيب نادر منين ؟؟ ده عايش في الغردقة علطول ومش بييجي هنا ابدا وكان مقاطع خالد من زمان ، ده حتي مش حضر دفن ولا عزاء اخوه .
: وهو هيعرف منين ان خالد مات ؟؟ ده مفيش اي وسيلة اتصال به ابدا !!
وبعدين ده مش موضوعنا لازم نادر يكون موجود .
: انا مش هعرف اوصله ، هتعرف انت توصله ؟؟
: سيبي الموضوع ده عليا وانا يومين وهقولك هنعمل ايه .
وبعد يومين اتفاجئت برشدي بيتصل بيا وبيقولي : علفكرة انا قدرت اوصل لنادر وكلمته .
: بجد ، طيب كويس جدا ، وبعدين عملت معاه ايه ؟
: نادر اتصدم لما عرف بموت اخوه ، وعاتبني اني ازاي مش عرفته لما خالد مات !! حاولت ابرر له موقفي لكنه كان غضبان جدا .
: وبعدين ؟
: طلبت منه انه يحضر يوم علشان نعمل اعلام الوراثة وقالي انه جاي بكره .
: عايزاك تبقي موجود معايا يا رشدي لما ييجي نادر .
: انا مش اقدر ابدا ارفضلك اي طلب لكن هبقي موجود بصفتي ايه ؟!!! انتوا الاتنين في صلة بينكم انما انا مهما كان شخص غريب .
: اوعي تقول كده يا رشدي ، بعد كل اللي عملته ده وبتقول انك شخص غريب !!
وبالفعل تاني يوم كانت الساعة ١١ قبل الضهر الموبايل رن كان رشدي بيقولي ان نادر هيوصل حوالي الساعة ٤ العصر وانه هيكون موجود معانا !!!
الحلقة ٢
: عايزاك تبقي موجود معايا يا رشدي لما ييجي نادر .
: انا مش اقدر ابدا ارفضلك اي طلب لكن هبقي موجود بصفتي ايه ؟!!! انتوا الاتنين في صلة بينكم انما انا مهما كان شخص غريب .
: اوعي تقول كده يا رشدي ، بعد كل اللي عملته ده وبتقول انك شخص غريب !!
وبالفعل تاني يوم كانت الساعة ١١ قبل الضهر الموبايل رن كان رشدي بيقولي ان نادر هيوصل حوالي الساعة ٤ العصر وانه هيكون موجود معانا !!!!
بعد الساعة ٤ العصر وصل نادر اخو خالد الله يرحمه ومعاه رشدي .
دخل نادر وكان زي عادته يملؤه الكبر والتعالي وقال : البقاء لله يا هيام ، مش المفروض لما اخويا مات أكون اول واحد يعرف علشان ادفنه واقف اخد عزاه ؟؟؟
رد رشدي : معلش يا نادر مفيش حد كان معاه رقم تليفونك وانت كنت مقاطع اخوك من سنين طويلة وكنا مرتبكين بسبب الحادثة والموقف المفاجئ اللي مفيش حد ابدا توقعه او عمل حسابه .
: وانت اتصلت بيا ازاي علشان تقولي علي اعلام الوراثة !!! ولا مش بتعرفوني الا لما تحتاجوني ؟؟
قولتله : مش وقت لوم وعتاب دلوقتي يا استاذ نادر ، دلوقت خالد اخوك الله يرحمه مات في حادثة فجأة وكان تفكيرنا مشلول .
رشدي : انا وصلت لرقم موبايلك عن طريق عبد الله صحبك .
نادر : طيب دلوقت عاوز اعرف هنعمل ايه ؟
رشدي : هنروح بكره نعمل اعلام وراثة ونخلص شوية اجراءات .
نادر : انت بتتكلم يا رشدي وبتقول ( هنروح ونخلص ) علي اساس ان انت واحد من العيلة ولا هتورث معنا ؟؟!!
رشدي شعر باحراج شديد ، اضطريت اني اتدخل وقولت لنادر : رشدي واقف معنا انا وخلود لأني مش بفهم اي حاجة في المواضيع دي ولازم نعمل الاوراق علشان نعمل معاش ليا و لخلود .
نادر : علفكرة يا هيام كنت عاوزك في موضوع مهم .
: خير يا نادر ؟ في ايه ؟
: لا لما نبقي لوحدنا هبقي اقولك .
رشدي حس بالاحراج اكتر وقال : طيب انا هستأذن انا دلوقتي ، رتبوا نفسكم وابقوا بلغوني هتعملوا ايه .
كان الموقف محرج اوي ، بعد استأذان وانصراف رشدي قولت لنادر :انت احرجت الرجل اوي ، وهو كتر خيره مش سايبنا من وقت الحادثة لحد دلوقت .
نادر : طيب سيبك من الموضوع ده دلوقتي وركزي معايا في اللي هقوله .
: قول يا نادر سمعاك .
: انتي دلوقتي لسه صغيرة مش كملتي ٣٥ سنة وخلود عندها ١٤ سنة ومش معقول هتعيشوا لوحدكم .
: وفيها ايه لو عيشنا لوحدنا !!!
: لأ فيها كتير ، مينفعش تعيشوا من غير راجل وانتي اكيد هتتجوزي .
: لا لا لا ، انا مش هتجوز تاني بعد المرحوم .
: مش هنضحك علي بعض يا هيام ، انتي لسه صغيرة وماشاء الله عليكي جميلة اوي جمال زيادة عن الطبيعي وهتلاقي كل يوم واحد بيطارك لو مش علشان يتجوزك يبقي علشان يمشي معاكي .
: انت ايه اللي بتقوله ده ؟ انا مش اسمحلك تقول كده !!!
: اقصد يا هيام ان اللي هيطمعوا فيكي كتير وفي النهاية هتضطري تتجوزي .
: انت عاوز تقول اي يا نادر ؟
: عاوز اقولك ان انا أولي من الغريب .
: يعني ايه ؟؟
: يعني عاوز اتجوزك .
: انت اتجننت يا نادر !!! اخوك ميت من اقل من اسبوع وجاي عاوز تتجوزني !!!
: الحي ابقي من الميت يا هيام ، وخالد الله يرحمه هو دلوقتي في الاخرة ، انما احنا لسه في الدنيا ولازم نشوف دنيتنا هتمشي ازاي .
وعلفكرة لو كان العكس اللي حصل وانتي اللي بعد الشر كان خالد فكر يتجوز في نفس اليوم .
: لا يا نادر اقفل الموضوع ده لأني مش بفكر فيه ولا هفكر فيه خالص .
: طيب ورشدي ؟
: ماله رشدي ؟
: مش كلمك في حاجة زي كده ؟؟
: لا طبعا .
: لكن انا راجل وبفهم الراجل اللي زيي ، رشدي بيفكر فيكي وهيكلمك في نفس الموضوع قريب .
: بص يا نادر انا اخر كلام عندي ، انا مش ليا دعوة بتفكيرك ولا تفكير كل واحد حواليا ، انا ليا دعوة بتفكيري انا وبس ، وانا تفكيري دلوقت رافض الفكرة دي جملة وتفصيلا .
وقبل ما يمشي نادر كان صلاح لسه بيتصل بيا وبيكلمني علي انه عاوز يساعدني في انهاء اي اوراق محتاجاها علشان المعاش !!!!!
رديت وعرفته ان رشدي هيساعدنا في كل الاوراق المطلوبة .
نادر : هيام خدي وقتك وفكري كويس مش هتلاقي حد ياخد باله منكم ويرعاكم اكتر مني .
: مش محتاجة تفكير يا نادر ...
: ارجوكي بلاش تردي دلوقتي ، هستني منك رد بعد شهور العدة .
تاني يوم روحنا كلنا انا وخلود ونادر ومعانا رشدي وصلاح كمان وخلصنا اجراءات اعلام الوراثة وبعدها نادر رجع الغردقة .
صلاح قالي : لما تكوني هتعملي اوراق المعاش قوليلي علشان ليا ابن خالي شغال هناك هيساعدك تخلصي كل الاجراءات بسرعة وبدون تعب .
: ياريت يا صلاح لأني مش عارفة اي حاجة .
: مش تشيلي هم ، انا هروح بكرة الصبح الشغل اللي كان فيه خالد واجيب اوراقه من هناك وهكلم ابن خالي علشان نخلص كل حاجة بسرعه .
: معلش يا صلاح هتتعب معانا .
: اوعي تقولي كده تاني يا هيام ، انتي مش عارفة انتي بالنسبالي ايه .
: نعم !!!!!!
: قصدي ، انك مش عارفة خالد الله يرحمه بالنسبالي ايه وانتي وخلود كمان بعتبركم اقرب الناس لقلبي .
: ربنا يخليك يا صلاح والمرحوم الله يرحمه كان بيعتبرك اخوه واكتر .
: لو مش وراكي حاجة بكره الصبح تعالي معايا نروح شغل خالد الله يرحمه نجيب منه اوراقه لأن ممكن مش يوافقوا يعطوني انا الورق لأني غريب فيطلبوكي انتي او اي حد من اهله .
: بكره مش هينفع يا صلاح علشان خلود مش فاضية تيجي معانا ، خليها احسن بعد بكره .
: مفيش داعي تتعبي خلود خليها ونروح انا وانتي .
وفعلا تاني يوم صلاح عدا عليا في البيت بعربيته وروحنا شغل جوزي الله يرحمه وهناك كل الشركة استقبلوني احسن استقبال ورحبوا بيا جدا وخلصوا كل حاجة في اسرع وقت . وقابلت مدير الشركة اللي اعطاني شيك بمكافأة نهاية الخدمة لجوزي الله يرحمه .
خرجنا من الشركة وركبنا العربية و كنت ملاحظة ان صلاح كل شوية يبص عليا ويسكت !! زي ما يكون عاوز يقول حاجة ومتردد !!
بعدها صلاح وقف بالعربية قدام كافية وقالي : انزلي نشرب حاجة في الكافية ده .
: مش له لزوم ، انا عايزة اروح بسرعة علشان مش اتأخر علي خلود .
: مش هنتأخر ، هتصل بابن خالي ييجي ياخد منك الاوراق هنا علشان يخلصلك المعاش بدل ما تروحي انتي وتتعبي .
: مش عايزة اتأخر .
: مش هنتأخر ولا حاجة ، بدل ما تروحي مشوار تاني هنوفر الوقت والمجهود .
صلاح اتصل بابن خاله وبعدها دخلنا الكافية وطلعنا فوق في ركن العائلات ، كنا تقريبا لوحدنا فوق !!
قعدنا فوق لمدة وصلاح بيحاول يفتح مواضيع مش لها اي لازمة وكل شوية يسكت ويسرح وبعدها اتفاجئت به بيمسك ايدي وبيقولي : تتجوزيني يا هيام ؟؟
انا اتصدمت صدمة شديدة جدا ، مش علشان طلب يتجوزني لأني كنت عارفة انه بيفكر في كده لكن الصدمة كانت من اسلوبة المفاجئ وكمان الوقت اللي مش مناسب .
: انت بتقول ايه يا صلاح ؟؟ انت في وعيك ولا شارب حاجة ؟؟
: انا في وعيي جدا وبكرر طلبي تاني ، انا عاوز اتجوزك .
: لا بجد انا مش مصدقة .
: ليه يا هيام ؟؟ انا من زمان اوي وانا بحبك وانتي عارفة كده كويس .
: انت بتتكلم ازاي يا صلاح !!! صاحب عمرك لسه ميت من اقل من اسبوع وانت عاوز تتجوز مراته !!! بقلم / عادل عبد الله
: هيام خالد الله يرحمه كان صحبي واخويا وكل حاجة لكن هو دلوقتي مات ، وانا لما اتجوزت هراعيكي انتي وبنتك واشيلكم في عينيا واوعدك انك معايا هتكوني اسعد ست في الدنيا وخلود هعوضها عن غياب ابوها .
: صلاح بلاش تخليني اتندم اني وافقت اخرج معاك لوحدنا .
: ليه بتقولي كده ؟؟ يعني بتقابلي حبي ليكي بالكلام اللي يزعل ده !!!
: صلاح اوعي تفكر اني نسيت لما كنت عاوز تخون خالد صاحب عمرك معايا !!! منين بتقول انه صاحبك واخوك ومنين كنت بتطاردني وعاوز تعمل معايا علاقة وهو عايش ؟؟!!
دخل علينا ابن خال صلاح فقطعنا كلامنا و بدأ صلاح يعرفه بيا ويقوله موضوعي واعطاه كل الاوراق وطلب منه انه يخلص المعاش في اقرب وقت .
روحت البيت بعد يوم متعب وقعدت افكر في كلام صلاح وافتكرت كمان كلام نادر البارح !!!
قعدت اضحك واقول لنفسي " في يومين اتقدملك عريسين ولسه جوزك ميت من اقل من اسبوع !!! اومال يا بت علي ما العدة تخلص هيكون اتقدملك كام عريس ؟؟!! "
دخلت خلود واستغربت لما شافتني بضحك وقالتلي بتعجب : انتي بتضحكي يا ماما ؟!!!
: ضحكت يا حبيبتي لما افتكرت ابوكي الله يرحمه ومواقفه معايا ، قاعدة لوحدي بقي قولت استرجع الذكريات .
خلود : بابا الله يرحمه كان احن واطيب اب في الدنيا .
كنت عايزة اضحك لكني ضحكت في سري وهي بتقول كده وقولتلها : ايوه طبعا المرحوم كان حنين اوي ، وافتكرت تصرفاته معايا واسلوبه العنيف واحيانا المهين اللي كان بيتعمد يعاملني به .
وبعد وقت قليل كانت ندي بترن علي الباب ، دخلت ندي وقعدنا نتكلم وكان نفسي اقولها ابعدي صلاح جوزك عني لأنه طلبني النهاردة للجواز .
لكن الحقيقة مش رضيت اعمل كده لأني عارفة ندي وجنانها ، لوقولتلها كده هتولعها حريقة وهتعمل مصيبة معاه وممكن معايا انا كمان !!!
لكن اللي استفزني اكتر لما بدأت ندي تتكلم عن جوزها وقالت : انتي متعرفيش صلاح جوزي طيب وحنين اد ايه ؟
: ربنا يخلهولك با ندي ، صلاح كويس اوي .
: وكمان بيحبني اوي يا هيام .
: اكيد لازم يحبك ، مش انتي مراته .
: لأ ، مش بيحبني حب عادي زي اي واحد لمراته ، ده بيحبني بجنون وعمره ما فكر يخوني ابدا .
' الصراحة كنت هموت من الضحك لكن مسكت نفسي ' وقولتلها : هو معقول يا حبيبتي اللي يبقي معاه ست جميلة زي القمر زيك يا ندوش يبص لست تانية ؟!!
كنت بقولها كده وانا بقول من جوايا اسكت يا لساني بلاش تقول ان جوزها اللي بتتكلم عنه ده لسه كان بيطلبني للجواز من ساعتين !!!!! بقلم/ عادل عبد الله
وبعد وقت قليل ياسمين مرات رشدي وصلت وقعدت معانا انا وندي وقعدنا نحكي احنا التلاتة علي ازواجنا التلاتة .
الفرق بين ياسمين مرات رشدي وندي مرات صلاح ان ياسمين رغم انها اجمل من ندي لكن عارفة وفاهمة جوزها كويس وعارفة انه له علاقات لكن ثفتها في نفسها جعلتها تستمر في الحياة معاه وعارفة ان اي علاقة له بتكون نزوة وبيرجعلها تاني ، انما ندي رغم انها مش فاهمة جوزها وبيستغفلها لكن مغرورة في نفسها وفاهمة ان جوزها اخلص رجل في الدنيا !!!
وبعد فترة مشيت ندي وبقيت ياسمين معايا لبليل وكنت بفكر اقولها علي كلام صلاح معايا وكلام نادر كمان لكن خوفت اسبب مشكلة وسكت .
حوالي الساعة ٩ اتصل رشدي بياسمين علشان يشوفها فين ولما عرف انها عندي بعد نص ساعة وصل علشان ياخدها ويروحها معاه .
لما طلع رشدي قعد معانا حوالي ساعة وطول القعدة كان بيبص ليا بنظرات حسيت منها انه عاوز يقولي كلام كتير .
تقريبا كنت حاسة هو عاوز يقول اي لكن حاولت اتجاهل نظراته !!
وقبل ما يمشي رشدي قالي : حاولي تجهزي اوراق المرحوم علشان نعمل اجراءات المعاش .
حسيت ان رشدي اتصدم لما قولتله : مش عارفة اقولك اي يا رشدي انا متشكرة جدا لكن خلاص صلاح اخد الاوراق واعطاها لواحد قريبه هيخلصها .
رشدي وضح عليه الصدمة وقالي : طيب تمام ، المهم ان الاجراءات تخلص بسرعة علشان تبدأي تصرفي معاش المرحوم .
تاني يوم الصبح صحيت من النوم علي صوت الموبايل وكان رشدي اللي بيتصل .
: الو ، ايوه يا رشدي ، في ايه ؟؟
: لا ابدا يا هيام انا اسف لو اتصلت في وقت مش مناسب .
: لا ابدا ، طمني ، في حاجة ؟؟
: لا اطمني مفيش حاجة .
: الصراحة انا اتخضيت لأنك مش متعود تتصل بيا في الوقت ده !!
: الحقيقة يا هيام انا طول الليل مش دوقت طعم النوم .
: معقول !! ليه خير فيه ايه ؟؟
: في موضوع مهم اوي عاوز اكلمك فيه .
: اتكلم يا رشدي انا سمعاك .
: لأ مش هينفع في التليفون ، لازم نقعد ونتكلم ، شوفي الوقت المناسب النهارده ونتقابل .
: لا يارشدي مش هينفع نتقابل بدون سبب ، اوعي تنسي اني ست ارملة ووحيدة وعيون الناس هتبقي عليا .
: في سبب ، وسبب مهم جدا كمان .
: طيب قول اي هو السبب ؟
: السبب اني بحبك يا هيام .
يتبع
تعليقات
إرسال تعليق